Əsas səhifə | Xəbərlər | Sumqayıt Dövlət Universitetinin Elmi Şurasının növbəti iclası videokonfrans formatında keçirildi
Sumqayıt Dövlət Universitetinin Elmi Şurasının növbəti iclası videokonfrans formatında keçirildi
Mayın 21-də Sumqayıt Dövlət Universitetinin Elmi Şurasının növbəti iclası onlayn formatda keçirildi. Rektor professor Elxan Hüseynov iclas iştirakçılarını salamlayaraq, koronavirus pandemiyası ilə mübarizədə Prezident cənab İlham Əliyevin uzaqgörənliyi, baş verənlərə dərhal ciddi reaksiya verməsi sayəsində respublikada vəziyyətin nəzarət altına alındığını, virusa yoluxanların sayının gündən-günə azaldığını bildirdi. Nazirlər Kabineti yanında Operativ Qərargah yaradıldığını, Nazirlər Kabinetinin Sərəncamına əsasən yoluxma hallarının qarşısının alınması və ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin davam etdirilməsi məqsədilə 2020-ci ilin mart ayının 10-dan bütün təhsil müəssisələrində tədris, təlim-tərbiyə prosesinin dayandırıldı və ölkə üzrə bütün kütləvi tədbirlərin təxirə salındığını şura üzvlərinin nəzərinə çatdıran rektor, belə bir ağır, fövqəladə vəziyyətdə Prezident cənab İlham Əliyevin verdiyi düzgün qərarlar, qabaqlayıcı tədbirlər sayəsində ölkəmizdə pandemiyanın təsirinin azaldılması və miqyasının məhdudlaşdırılması istiqamətində mühüm addımlar atıldığını, dövlətimizin bütün imkanlarının epidemiyanın qarşısının alınmasına və fəsadların aradan qaldırılmasına yönəldildiyini, məktəblərdə təhsilin dayandırılması, sərhədlərin vaxtında bağlanması, müasir tipli yeni xəstəxananın istifadəyə verilməsi, lazımi tibbi avadanlıqların ölkəyə gətirilməsi, aztəminatlı ailələrə sosial müavinət və yardımların ayrılması, sosial baxımdan həssas əhali qrupuna aid edilən ailələrin üzvü olan tələbələrin təhsil haqlarının ödənilməsi, ən əsası isə, mənəvi dəstək, "Biz birlikdə güclüyük!” kimi müdrik çağırış bu vəziyyətdən ən az itki ilə çıxmağımıza səbəb olduğunu söylədi. Görülən bütün bu işlər sübut etdi ki, Prezident cənab İlham Əliyev hər şeydən çox xalqın sağlamlığını düşünür. O, öz fəaliyyəti ilə ümummilli liderin başladığı işi davam etdirməyə qadir olduğunu bir daha sübut etdi. Ölkə başçısı İlham Əliyevlə bərabər Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın fəaliyyətində də Azərbaycan təhsilinin tərəqqisi xüsusi yer tutur. Başda Mehriban xanım olmaqla Heydər Əliyev Fondunun karantin dövründə yüz minlərlə aztəminatlı ailələrə ərzaq yardımı etməsi Ulu öndərin adını daşıyan fondun hər bir azərbaycan vətəndaşının yanında olduğunu bir daha sübut etdi.Respublikamızda görülən işlərin davamı kimi karantin dövründə Sumqayıt Dövlət Universitetinin bütün kollektivi də həmişə olduğu kimi möhtərəm prezidentimizin daim yanında olduqlarını əməli işləri ilə göstərdilər. Professor-müəllim heyəti həm “EVDƏ QAL” çağırışına qoşuldu, həm də tələbələrə müxtəlif proqramlardan istifadə edərək məsafədən təhsil verməyi davam etdirdi.
Rektor professor Elxan Hüseynov tədrisin gedişatına toxunaraq bildirdi ki, koronavirusla mübarizə ilə bağlı zəruri tədbirlərin görülməsilə əlaqədar dərslərin müvəqqəti dayandırıldığı nəzərə alınaraq, Təhsil Nazirliyinin göstəriş və tövsiyələrinə uyğun olaraq, Sumqayıt Dövlət Universitetində tədris prosesinin onlayn formada WhatsApp mesajlaşma mübadilə sistemindən, “Zoom” onlayn konfransların keçirilməsi proqramından və “Microsoft Teams” platformasından, oflayn formada isə distant təhsilin təşkil edilməsi üçün nəzərdə tutulmuş Moodle sistemindən və WhatsAppdan istifadə olunmaqla tədris prosesi təşkil olunmuşdur.
Rektor Azərbaycan Respublikası Nazirlər Kabinetinin “Koronavirus (COVID-19) pandemiyasının ölkənin təhsil müəssisələrində təhsil prosesinə mənfi təsirinin aradan qaldırılması ilə bağlı bir sıra qərarlara dəyişikliklər edildiyini bildirdi. Həmin dəyişikliklərdən irəli gələn tələblər barədə şura üzvlərininin diqqətinə çatdırdı. Bildirdi ki, 2019/2020-ci tədris ilinin yaz semestrinin onlayn rejimdə təşkili nəzərə alınaraq, imtahan sessiyasının mövcud qaydalara uyğun təşkil edilməsi, tələbələrin biliyinin qiymətləndirilməsində şəffaflığın və obyektivliyin təmin edilməsi, imtahan sessiyasının mövcud normativ sənədlər əsasında keçirilməsi, təhsil müəssisələrində imtahan qərargahlarının yaradılması, bu qərargahlara daxil olan hər bir şikayətin qısa müddətdə çevik şəkildə araşdırılıb lazımi tədbir görülməsi, sessiya başlamazdan öncə imtahanların şəffaf və obyektiv keçirilməsi məqsədilə fakültə dekanları, kafedra müdirləri qarşısında konkret vəzifələr qoyulub. Rektor qarşıdan gələn Ramazan bayramı və Respublika günü ilə əlaqədar kollektivi təbrik etdi.
Gündəlikdə duran məsələlər ilə bağlı Tədrisin təşkili və təlim texnologiyaları üzrə prorektor dosent Natiq Talıbov 2019/2020-ci tədris ilinin yaz semestrinin imtahan sessiyasına hazırlığın vəziyyəti və Koronavirus Pandemiyası ilə əlaqədar Yekun Dovlət Attestasiyasının və imtahan sessiyasının keçirilməsində həyata keçiriləcək dəyişikliklər barədə məlumat verərək bildirdi ki, Azərbaycan Respublikası Nazirlər Kabinetinin “Koronavirus (COVID-19) pandemiyasının ölkənin təhsil müəssisələrində təhsil prosesinə mənfi təsirinin aradan qaldırılması ilə bağlı bəzi tədbirlər barədə” 2020-ci il 18 may tarixli 179 nömrəli qərarı ilə Azərbaycan Respublikası Nazirlər Kabinetinin bir sıra qərarlarına dəyişikliklər edilmişdir. Həmin dəyişikliklərdən irəli gələn tələblər barədə şura üzvlərininin diqqətinə çatdırdı.
Prorektor Natiq Talıbov Sumqayıt Dövlət Universitetində 2019/2020-ci tədris ili yaz imtahan sessiyasının təşkili barədə bir sıra dəişikliklərin edilməsi haqqında ətraflı məlumat verdi.
1. Buraxılış işini yerinə yetirən tələbələr də Ümumi Orta Müvəffəqiyyət Göstəricisinə görə Yekun Attestasiyadan keçmiş hesab olunsunlar. Qiyməti ilə razılaşmayan tələbələr buraxılış işlərini kağız daşıyıcı formasında şəxsən, mümkün olmadıqda poçt vasitəsi ilə və ya elektron formada universitetə təqdim etsinlər. Buraxılış işinin məzmununa, yazılmasına və müdafiəsinə qoyulan tələblər gözlənilməklə müdafiə onlayn qaydada təşkil olunsun.
2. Kontingentdə qalan tələbələr bütün kreditləri ləğv etdiyi halda Ümumi Orta Müvəffəqiyyət Göstəricinə görə Attestasiyadan keçmiş hesab olunsunlar.
3. Magistr dissertasiyaları kağız daşıyıcı formasında şəxsən, mümkün olmadıqda poçt vasitəsi ilə və ya elektron formada universitetə təqdim olunsun. Magistr dissertasiyalarının məzmununa, yazılmasına və müdafiəsinə qoyulan tələblər gözlənilməklə müdafiə onlayn qaydada təşkil olunsun.
4. Bakalavriat və magistratura səviyyələrində imtahan sessiyasının təşkili, tələbələrin biliyinin cari qiymətləndirmə aparılmadan imtahanda topladığı bal 2-yə vurulmaqla hesablansın. Keçid bal minimum 26 bal qəbul olunsun.
5. Müxtəlif səbəblərdən cari imtahan sessiyasında iştirak edə bilməyən tələbələrin istəyi və müraciətləri olduğu halda avqustun 17-dən, sentyabrın 15-nə qədər icmal mühazirələr və imtahanlar təşkil edilsin.
6. Hal-hazırda keçirilən akkreditasiyada Sumqayıt Dövlət Universitetinin özünütəhlil hesabatı zamanı bakalavr və magistratura səviyyəsi üzrə buraxılış kurslarında aparılmış imtahanların nəticələri nəzərə alınsın.
İmtahanlar onlayn şəkildə Microsoft Teams və ya Zoom proqramı vasitəsilə həyata keçiriləcək.Qərar Elmi Şura üzvüləri tərəfindən qəbul edildi.
Azərbaycan Dövlət Neft və Sənaye Universitetinin 100 illiyi ilə əlaqədar keçiriləcək tədbirlər barədə Humanitar məsələlər üzrə prorektor dosent Ramiz Hüseynov ətraflı mlumat verərək bildirdi ki, Azərbaycan Respublikasının Prezidenti cənab İlham Əliyev Azərbaycan Dövlət Neft və Sənaye Universitetinin 100 illik yubileyinin keçirilməsi haqqında 6 fevral 2020-ci il tarixli 1801 nömrəli Sərəncam imzalamışdır. Sərəncama uyğun tədbirlər planının təsdiq edilməsi ilə bağlı Azərbaycan RespublikasınınTəhsil Naziri 18.05.2020-ci il tarixli F-238 nömrəli əmr vermişdir. Sərəncama uyğun olaraq Sumqayıt Dövlət Universitetində ADNSU-nun 100 illik yubileyinin yüksək səviyyədə keçirilməsi məqsədilə Azərbaycan Respublikası Təhsil Nazirliyinin Tədbirlər planını əsas götürərək Tədbirlər planı hazırlanıb.
Cari məsələlər barədə Elmi katib professor Muxtar Səmədov məlumat verdi. Qeyd etdi ki, Elmi Şuraya nəşr hüququ (qrif) verilməsi üçün bir monoqrafiya, iyirmi beş fənn proqramı daxil olub. Onlar müvafiq kafedralarda, fakültə Elmi Şuralarında, TMŞ-da və Redaksiya Şurasında baxıldıqdan sonra müsbət rəylə Universitet Elmi Şurasına təqdim olunub.
Aparılan müzakirələrdən sonra təqdim olunan tədris vəsaitlərinin nəşr olunmasına qərar verildi.
 
Mətbuat xidməti

 

ÜNVAN
ƏLAQƏ VASİTƏLƏRİ
SUMQAYIT DÖVLƏT UNİVERSİTETİ
Sumqayıt, Azərbaycan
43cü məhəllə
AZ5008
Telefon: +994-18 642-16-20
Faks: +994-18 642-02-70
E-Mail: info@sdu.edu.az