Tələbə-gənclər klubu
Tələbə-gənclər klubu Sumqayıt Dövlət Universitetində 2000-ci ildən fəaliyyət göstərir. Yarandığı gündən Tələbə-gənclər klubunda üç yüzə yaxın universitetdaxili mədəni-kütləvi tədbir, disput, müsamirə və müsabiqə keçirilmişdir. Klubda “Səma” rəqs kollektivi, “Renesans” tələbə teatrı, dekorativ-tətbiqi sənətlər dərnəyi, “Tələbə” musiqi ansamblı fəaliyyət göstərir.
2015-ci ildən kluba Quliyeva Xalidə Pənah qızı rəhbərlik edir. Klubun əməkdaşları mədəni-kütləvi tədbirlərin, əlamətdar və tarixi günlərin, milli bayramların yüksək səviyyədə keçirilməsi üçün istedad və bacarıqlarını əsirgəmirlər. Məhz buna görədir ki, son bir neçə ildə klub və klubun bir sıra əməkdaşı Fəxri fərmanlara layiq görülmüş, mükafatlar almışdır.
2016, 2017 və 2018-ci illərdə Azərbaycan Respublikasının Gənclər və İdman Nazirliyinin təşkil etdiyi “Tələbə baharı” IX, X və XI Ümumrespublika Tələbə Yaradıcılıq Festivalında universitetin “Səma” rəqs ansamblı Milli rəqslər nominasiyası üzrə III yerə layiq görülmüşdür. 2018-ci ildə Təhsil Nazirliyi və Azad Həmkarlar İttifaqının təşkil etdiyi ümummilli lider Heydər Əliyevin anadan olmasının ildönümünə həsr olunmuş universitet tələbələrinin bədii özfəaliyyət kollektivlərinin baxış müsabiqəsində uğurla çıxış edərək universitetin “Səma” rəqs ansamblı Milli rəqs üzrə II yerə, 2019, 2022-ci illərdə həmin müsabiqədə III yerə layiq görülmüşdür (Bədii rəhbər Gülnarə Abasovadır).
“Renessans” dram dərnəyinin əsas üzvləri fakültələrdə seçilən istedadlı tələbələrdən ibarətdir. Hər il bu tələbələrin sırası yeni istedadlarla zənginləşir. Bu dərnək 2000-ci ildən fəaliyyət göstərir. Tələbə teatrı bir qayda olaraq Azərbaycan ədəbiyyatının klassik və çağdaş nümayəndələrinin əsərlərinə müraciət edir, öz repertuarını daim zənginləşdirir.
“Tələbə” musiqi dərnəyi də 2000-ci ildən fəaliyyət göstərir. Bütün bayramların, əlamətdar günlərin musiqi hissəsini universitetin tələbə musiqiçiləri hazırlayır. SDU-nun ictimai həyatında, bayram tədbirlərində fəal iştirak edən tələbə musiqiçilər və rəqs qrupu dəfələrlə qocalar evində, əqli və fiziki cəhətdən qüsurlu uşaqlar üçün Saray qəsəbəsindəki 7 saylı internat evində, hərbi hissələrdə təmmənasız konsert proqramı ilə çıxış etmişlər.
Zaur Səfərovun və Şəfəq Əliyevanın rəhbərliyi altında çalışan xor kollektivi “Xalq mahnıları”, “Estrada musiqisi”, “Muğam musiqisi” nominasiyası üzrə keçirilən “Tələbə baharı” Ümumrespublika Tələbə Yaradıcılıq Festivalında və ümummilli lider Heydər Əliyevin anadan olmasının ildönümünə həsr olunmuş universititet tələbələrinin bədii özfəaliyyət kollektivlərinin baxış müsabiqəsində müntəzəm olaraq çıxış edir, yüksək yer tutur. Zaur Səfərov həm də Sumqayıt Dövlət Universitetinin himninə (sözləri “Əməkdar jurnalist” Avtandil Ağbabanındır) musiqi bəstələmişdir.
2018-ci ildən klubun nəzdində yaradılmış Şən və Hazırcavablar Klubunun “Subaylar” komandası fəaliyyət göstərir. Klubun bədii rəhbəri Məcid Hüseynovun əməyi sayəsində komanda Təhsil Nazirliyinin təşkilati dəstəyi ilə 2018-2019-cu tədris ilində ali təhsil müəsissələri arasında keçirilən Azərbaycan Regional Şən və Hazırcavablar Klubunun TV Liqasının final mərhələsində müvəffəqiyyətlə çıxış edərək diplomla təltif edilmiş və I yerə layiq görülmüşdür.
2019-cu ildə Azərbaycan xalqının çoxəsrlik ənənələrinə malik bədii və fəlsəfi fikrində dərin iz qoymuş mütəfəkkir şair İmadəddin Nəsiminin 650 illik yubileyi qeyd olunmuşdur. Bununla əlaqədar Azərbaycan Respublikasının Prezidenti cənab İlham Əliyevin 11 yanvar tarixli Sərəncamına əsasən 2019-cu il “Nəsimi ili” elan edilmişdir. Azərbaycan Dövlət Mədəniyyət və İncəsənət Universitetində keçirilməsi nəzərdə tutulmuş silsilə tədbirlərin tərkib hissəsi olan “Hüsnü-cəmal, əqli-kamal” adlı ali məktəblərarası bədii qiraət müsabiqəsində Sumqayıt Dövlət Universiteti layiqincə təmsil olunmuşdur.
Klubda rəssamlıq və dekorativ sənətlər dərnəyi bir neçə ildir ki, fəaliyyət göstərir. Klubun tərtibatçı rəssamı Sübhanə Balcanlının rəhbərliyi ilə dərnək üzvlərinin rəssamlıq və dekorativ sənət nümunələri nümayiş etdirilir, maraqlı sərgilər təşkil olunur, kollektiv tərəfindən rəğbətlə qarşılanır.
Mətbuat xidməti