Əsas səhifə | Xəbərlər | Əməkdaşlarımız "Qarabağın təbii sərvətləri" mövzusunda keçirilən vebinarda iştirak etdilər
Əməkdaşlarımız "Qarabağın təbii sərvətləri" mövzusunda keçirilən vebinarda iştirak etdilər

Bakı Ali Neft Məktəbi, Ekologiya və Təbii Sərvətlər Nazirliyinin birgə təşkilatçılığı ilə “Qarabağın təbii sərvətləri" mövzusunda vebinar keçirildi. “ZOOM” platforması üzərindən keçirilən vebinarda Qarabağın zəngin təbii sərvətləri barədə geniş müzakirələr aparıldı. Müxtəlif yerli, transmilli şirkətlərdən, təhsil müəssisələrindən, idarə və təşkilatlardan 700 nəfərin iştirak etdiyi vebinarda Bakı Ali Neft Məktəbinin rektoru Elmar Qasımov, Milli Məclisin Təbii ehtiyatlar, energetika və ekologiya komitəsinin sədri, Millət vəkili Sadiq Qurbanov, Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Əli Əliyev və Bakı Ali Neft Məktəbinin Neft-Qaz mühəndisliyi kafedrasının dosenti Qəşəm Zeynalov məruzəçi qismində çıxış etdilər. Bakı Ali Neft Məktəbinin rektoru Elmar Qasımov çıxışında bildirdi ki, Ermənistanın Azərbaycan torpaqlarını zəbt etməsinin əsas səbəblərindən biri də bu ərazilərin təbii sərvətlərlə, o cümlədən su, meşə, torpaq ehtiyatları ilə zəngin olmasıdır. Rektor qondarma Dağlıq Qarabağ rejimi tərəfindən qəbul edilən təbii sərvətlər və onun istifadəsinə dair bir çox fərman və sərəncamların təbii sərvətlərlin talanmasına xidmət etdiyini qeyd etdi. “Ümumiyyətlə, Dağlıq Qarabağ termini işlədilməməlidir. Bu terminin nə coğrafi, nə də, tarixi əsası var. Azərbaycanın Qarabağ bölgəsi deyilməlidir. Biz təklif edirik ki, hər bir ali məktəb öz profilinə uyğun olaraq istiqamətlər üzrə Qarabağın tarixini, turizim və logistik imkanlarını və s. məsələləri araşdırsınlar” – deyə, E.Qasımov qeyd etdi. Milli Məclisin Təbii ehtiyatlar, energetika və ekologiya komitəsinin sədri, Millət vəkili Sadiq Qurbanov milyardlarla ABŞ dolları gəlir gətirən mineral xammal ehtiyatlarımızın ermənilər tərəfindən asanlıqla talan edildiyini qeyd etdi. O, faydalı qazıntıların talanı nəticəsində dəymiş zərərin məbləğinin dəqiq araşdırmalar nəticəsində müəyyən olunacağını bildirdi. Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Əli Əliyev isə bildirdi ki, Ermənistan tərəfindən işğal edilmiş Azərbaycan Respublikası ərazilərində işğaladək olan dövrdə ehtiyatları təsdiq olunmuş 163 müxtəlif növ faydalı qazıntı yatağı, o cümlədən 4 qızıl, 7 civə, 2 mis, 1 qurğuşun və sink, 1 daş kömür, 7 gəc, 4 vermikulit, 1 soda istehsalı üçün xammal, 12 əlvan və bəzək daşları (obsidian, mərmərləşmiş oniks, yəşəm və s.), 10 mişar daşı, 21 üzlük daşı, 10 gil, 21 sement xammalı, 8 müxtəlif növ tikinti daşları, 6 əhəng xammalı, 11 qum-çınqıl, 4 tikinti qumu, 1 perlit, 8 pemza-vulkan külü, 16 yeraltı şirin su və 10 mineral su yatağı mövcud olub. Xidmət rəisi Azərbaycan Respublikasının erməni silahlı qüvvələri tərəfindən işğal olunmuş ərazilərində ümumiyyətlə 561 yataq və perspektivli minerallaşma sahəsinin müəyyən edildiyini diqqətə çatdırdı. Vebinarda qeyd edildi ki, Azərbaycan Respublilkasının Prezidenti cənab İlham Əliyevin tapşırığına əsasən işğal olunmuş ərazilərimizdə Ermənistanın Azərbaycana vurduğu zərərlər: vətəndaşların mülkiyyəti, infrastruktur, mədəniyyət abidələri və s. ilə yanaşı, həm də Azərbaycana məxsus təbii resursların qeyri-qanuni istismarı haqqında kompleks qiymətləndirilmə aparılır. Məqsəd talançılıq siyasətini həyata keçirən düşmən ölkənin siyasi rəhbərliyinin məsuliyyətə cəlb olunması ilə bağlı bütün lazımi tədbirləri həyata keçirməkdir. Qeyd edək ki, vebinarda Sumqayıt Dövlət Universitetinin əməkdaşları: dosent Rəhilə Əhmədova və Ekologiya kafedrasının əməkdaşları – professorlar: Əkbər Ağayev, Tahir Ağayev, İlham Mərdanov, dosent Samir Orucov və digərləri iştirak etdilər.

 
Mətbuat xidməti
ÜNVAN
ƏLAQƏ VASİTƏLƏRİ
SUMQAYIT DÖVLƏT UNİVERSİTETİ
Sumqayıt, Azərbaycan
43cü məhəllə
AZ5008
Telefon: +994-18 642-16-20
E-Mail: info@sdu.edu.az