Fevralın 16-da ABŞ-ın Azərbaycandakı Səfirliyinin elm, mədəniyyət və təhsil sahəsində həyata keçirdiyi proqramlar çərçivəsində “Akademik məqsədlər üçün ingilis dili” təliminin 1-ci mərhələsini uğurla başa çatdırmış iştirakçılara sertifikatların təqdim olunması mərasimi keçirildi.

Tədbiri Beynəlxalq əlaqələr üzrə prorektor dosent Qafar Atayev açaraq iştirakçıları salamladı, başa çatan təlimin əhəmiyyətindən danışdı və ABŞ-ın Azərbaycandakı Səfirliyi ilə SDU arasında əməkdaşlığı yüksək qiymətləndirdi.

Görüşdə ABŞ-ın Azərbaycandakı Səfirliyinin nümayəndələri: Mədəniyyət məsələləri üzrə müşaviri Richard Pinkham, İctimaiyyətlə əlaqələr departamentinin təhsil mütəxəssisi Ramina Mürşüdova, Virtual ingilis dili proqramının meneceri Sabina Abdullayeva iştirak edirdilər. Qafar Atayev qonaqları universitetimizdə görməkdən məmnunluğunu bildirdi, hörmətli rektorumuz professor Elxan Hüseynovun salamlarını tədbir iştirakçılarına çatdırdı, yaratdığı şəraitə görə bizim də salamlarımızı və təşəkkürümüzü ABŞ-ın Azərbaycandakı səfiri cənab Le Litsenbergerə çatdırmalarını xahiş etdi.

Daha sonra Riçard Pinkham çıxış edərək SDU-nun təhsilin beynəlmiləlləşməsi istiqamətində ABŞ Səfirliyinin təklif etdiyi əməkdaşlıq imkanlarından bəhrələnməyini müsbət hal kimi dəyərləndirdi.

Qeyd edək ki, oktyabrın 18-dən SDU-nun Beynəlxalq əməkdaşlıq və əcnəbi tələbələr şöbəsinin təşəbbüsü ilə universitetin ingilis dili müəllimlərini beynəlxalq səviyyədə tətbiq edilən yeni tədris metodları ilə tanış etmək və onların dil bacarıqlarının akademik səviyyədə istifadəsini inkişaf etdirmək məqsədilə ABŞ-ın Azərbaycandakı Səfirliyi “Akademik məqsədlər üçün ingilis dili” adlı 11 həftəlik təlimlərə start vermişdi. Təlimlərin yekununda onlayn şəkildə keçirilmiş imtahanın nəticəsinə görə birinci yerə Beynəlxalq əməkdaşlıq və əcnəbi tələbələr şöbəsinin əməkdaşı Aysel Eminova, ikinci və üçüncü yerlərə Xarici dillər kafedrasının əməkdaşları Günel Vəliyeva və Lamiyə Heydərova layiq görülmüşlər. Ümumilikdə təlimlərdə aktiv iştirak edərək yüksək müvəffəqiyyət göstəricisi əldə etmiş 20 nəfər iştirakçıya Richard Pinkham tərəfindən ABŞ Səfirliyinin sertifikatları təqdim edildi.

Cari ilin fevral ayından SDU-nun əməkdaşları üçün ABŞ-ın Azərbaycandakı Səfirliyi təlimlərin növbəti mərhələsinə start verəcəkdir.

Ramina Mürşüdova, Sabina Abdullayeva, Filologiya fakültəsinin Xarici dillər kafedrasının müdiri professor Nigar İsgəndərova və digər iştirakçılar ürək sözlərini bildirərək ABŞ-ın Azərbaycandakı Səfirliyi ilə SDU arasında mütəmadi əməkdaşlıqların əhəmiyyətini qeyd etdilər.

Sonda dosent Qafar Atayev gələcəkdə qarşılıqlı əməkdaşlığın daha da inkişaf etdirilməsində maraqlı olduğumuzu qeyd edərək tədbirə yekun vurdu.