“Kibernetika və İnformatikanın Problemləri” VI Beynəlxalq Konfransı işə başladı

Elm və Təhsil Nazirliyi İdarəetmə Sistemləri İnstitutunda (İSİ) “Kibernetika və İnformatikanın Problemləri” mövzusunda VI Beynəlxalq Konfrans (PCI 2025) öz işinə başlayıb. Konfrans Türkiyə, Ukrayna, Qazaxıstan, Yunanıstan və digər ölkələrin nüfuzlu elmi qurumlarının təşkilatçılığı ilə keçirilir. Konfransda ABŞ, Türkiyə, Yaponiya, Polşa, Fransa, Belçika, Gürcüstan, Almaniya, Avstraliya, Ukrayna, Rusiya, Estoniya, İsveçrə, Bolqarıstan, Özbəkistan, Qazaxıstan və digər ölkələrin aparıcı alimləri iştirak edir.

Elm və Ali Təhsil üzrə Dövlət Agentliyinin direktor müavini, Sumqayıt Dövlət Universitetinin rektoru v.i.e., AMEA-nın müxbir üzvü, professor Əminağa Sadıqov konfransın açılışında iştirak edib. O, tədbirdə çıxış edərək PCI beynəlxalq konfransının təsis olunduğu vaxtdan ardıcıl olaraq keçirildiyini və getdikcə daha geniş coğrafiyanı əhatə etdiyini bildirib.

Professor Əminağa Sadıqov kibernetika və informatikanın yalnız texnoloji deyil, həm də sosial, iqtisadi və idarəetmə sahələrinə təsir göstərən geniş spektrli problemləri əhatə etdiyini diqqətə çatdırıb. O, konfrans materiallarının nüfuzlu beynəlxalq elmi bazalarda indeksləşdirilməsinin tədbirin qlobal elm ictimaiyyəti tərəfindən tanınmasına və elmi nəticələrin daha geniş auditoriyaya çatdırılmasına şərait yaratdığını qeyd edib.

Alim vurğulayıb ki, son illərdə ETN ilə Elm və Ali Təhsil üzrə Dövlət Agentliyi ölkədə keçirilən beynəlxalq və respublika səviyyəli konfranslara dair yeni tələblər hazırlayaraq elm və təhsil müəssisələrinə təqdim edib və vaxtaşırı keçirilən tədbirlərin qiymətləndirilməsini həyata keçirir. Bu addım ölkədə təşkil olunan elmi tədbirlərin beynəlxalq standartlara uyğunluğunu təmin etməyə xidmət edir.

Əminağa Sadıqov qeyd edib ki, konfrans Azərbaycan Respublikası Prezidentinin təsdiq etdiyi “Azərbaycan Respublikasında Rəqəmsal İnkişaf Konsepsiyası”nın və “Azərbaycan Respublikasının 2025–2028-ci illər üçün Süni İntellekt Strategiyası”nın icrasına mühüm töhfə verəcək. O, həmçinin PCI konfranslarının yüksək təşkilatçılıq səviyyəsi ilə seçildiyini və Təhsil Nazirliyi tərəfindən dəstəkləndiyini vurğulayıb. O, nəzəri və praktiki baxımdan böyük əhəmiyyət daşıyan bu tədbirin yeni ideya və təşəbbüslərin formalaşmasına təkan verəcəyinə inamını ifadə edib. Gələcək konfranslarda praktiki istiqamətlərə də daha geniş yer ayrılmasının zəruriliyini qeyd edərək, tədbirin işinə uğurlar arzulayıb.