Oktyabrın 29-da Sumqayıt Dövlət Universitetində (SDU) Həmkarlar İttifaqı Komitəsi (HİK) və İnsan Kapitalının İdarə Edilməsi Mərkəzinin birgə təşkilatçılığı ilə “Yaradıcı təfəkkür” adlı təlim keçirilib. Təlimin açılışında Sosial məsələlər və ictimaiyyətlə əlaqələr üzrə prorektor dosent Elmar Xəlilov çıxış edərək belə tədbirlərin əhəmiyyətini vurğulayıb. Bildirib ki, bu kimi təşəbbüslər müəllimlərin və əməkdaşların peşəkar inkişafına, yaradıcı potensialın artırılmasına və müasir təhsil mühitinin formalaşmasına mühüm töhfə verir. Sonra Tədris Metodiki Mərkəzin əməkdaşı, təlimçi Aynurə Bağırova “Yaradıcı təfəkkürün tədrisdə rolu” mövzusunda təqdimatla çıxış edib. O, yaradıcı düşüncənin gündəlik fəaliyyətə və pedaqoji prosesə təsiri, fərdi yanaşmaların formalaşması, motivasiya və innovativ düşüncə tərzinin inkişafı istiqamətində iştirakçılarla praktiki bilik və təcrübəsini bölüşüb. Təlim interaktiv müzakirələr, qrup işləri və real dərs situasiyalarının təhlili üzərində aparılıb. İştirakçılar tədrisdə yaradıcılığı stimullaşdıran müxtəlif metodlardan istifadə etməyin yollarını praktik şəkildə öyrəniblər.