Avqustun 16-da Fövqəladə Hallar Nazirliyinin Böhran Vəziyyətlərində İdarəetmə Mərkəzinin verdiyi məlumata əsasən, Sumqayıt şəhər Corat qəsəbəsi yaxınlığındakı çimərlikdə 2 nəfər dənizdə batıb. Dəniz kənarında axtarış zamanı Sumqayıt Dövlət Universitetinin tələbələrinə məxsus sənədlər aşkarlanıb. Sənədlər Sumqayıt Dövlət Universitetinin İqtisadiyyat və idarəetmə fakültəsinin 3-cü kurs tələbələri Biznesin təşkili və idarə edilməsi ixtisası üzrə təhsil alan 1998-ci il təvəllüdlü Sadıqov Elməddin Fəzail oğlu və Menecment ixtisası üzrə təhsil alan 1998-ci il təvəllüdlü Vəliyev Qürbət Məhəmməd oğluna məxsusdur. Hadisə yerinə Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri cəlb olunub. Havanın əlverişsiz olmasına baxmayaraq hazırda axtarış işləri aparılır. İrəliləyən dəqiqələrdə hadisə ilə bağlı əlavə məlumat veriləcək.

Mətbuat xidməti